<

►

>

قال النائب طوني فرنجيه:
أن تكون سيادياً لا يعني الذهاب إلى واشنطن للتحريض على الجيش أو العهد.
أن تكون سيادياً، يعني أن تكون مرشحاً لرئاسة الجمهورية وتقرّر رغم كلّ الضغوط والإغراءات، دعم قائد الجيش آنذاك من دون قيد أو شرط، من أجل مصلحة لبنان .
هكذا تكون السيادة وهكذا نحن “المرده”. لا ننتظر التعليمات من أحد.
شبابنا، اتهموكم بالمنظومة وهتفوا بشعارات السيادة. طلعت سيادتهم، سيادة “أبو عمر”.
فرنجيه، وفي عشاءٍ لمكتب الشباب والطلاب في “تيار المرده” تحت عنوان “أنتم السيادة”، حضره عدد من النواب والوزراء الحاليين والسابقين، قيادات في “المرده” بالاضافة إلى فعاليات بلدية ، تربوية ، أمنية ، إعلامية وفنية، وقدّمته الإعلامية ليال جبرايل، أكّد أن “السنوات الأخيرة، لم تكن محطات تراجع بل مساحة مواجهة ونضوج وتعلّم.
اخترنا أن نكون في قلب الواقع، نواجه ونمضي إلى الامام بمسؤولية وبعمل جدي، مبني على المبادرة وبعيد عن الشعارات وردود الفعل”.
وتابع: “قيمنا ثابتة ورِثناها من يوسف بك كرم وحميد فرنجيه وسليمان فرنجيه:
نُقدّم مصلحة لبنان فوق كل اعتبار، من دون أن نسكت عن الحق ومن دون تجاهل قتل النساء والأطفال ومن دون تبرير الظلم، كائناً من ما كان الظالم”.
ووجه فرنجيه رسالة للأحزاب اللبنانية قائلاً:
“كما سبق ودعا رئيس المرده سليمان فرنجيه: بدنا نغيّر الـ SOFTWARE
SOFTWARE الالغاء وعدم الاعتراف بالآخر ما بقى يمشي اليوم.
بدنا SOFTWARE لبنان أولاً. بدنا SOFTWARE وطني دائماً على حق”.
وتابع “دعوتنا لفخامة الرئيس، الذي لدينا ملء الثقة به لإعادة بناء هيبة الدولة.
دعوتنا لإطلاق حوار وطني جدي وعميق، يؤسس لموقف وطنيّ جامع، لا إلى انقسامات جديدة، يدفع ثمنها لبنان وشباب.
اللبنانيون يريدون الدولة الواحدة القوية، القادرة على تطبيق القانون وحمايتهم على طول الـ 10452 كلم²
وهذا يتطلب عهداً قوياً.
ويتطلب أن نكون إلى جانب العهد ونمنحه الزخم المطلوب.
كما يتطلّب الإعتراف بأن المستقلين الحقيقيين ليسوا أصواتاً ضائعة بل قيمة مضافة وركيزة أساسية لأي مشروع إنقاذي.
وفي ما يتعلق بـ “قانون الانتظام المالي واسترداد الودائع”، قال: عدم إدخال تعديلات على هذا القانون يعني عدم إقراره، وهذا ما يريده البعض، غير آبهين بأموال المودعين، بكل القطاعات المنتجة، وبالإقتصاد الوطني والشركات الناشئة، والمستثمرين وقروض الإسكان وقروض الطلاب والقطاع المصرفي”.
وختم متوجهاً إلى الشباب:
“شبابنا، أنتم الجيل الأول الذي يتسلّم قيادة البلد بعد الحرب
تمسّكوا بروح الانفتاح.
قولوا الحق وحافظوا على مصالح لبنان.
وقفوا دائما بوجه كلّ أنواع التطرّف والانعزال وحاسبوا من يستثمر بالكراهية ويدفع إلى التفرقة بيننا كلبنانيين.
حاسبوا من يزرع فينا الخوف من الآخر، من شريكنا في الوطن”.
فنبقى موحدين برؤية واحدة، ومتفهمين لمخاوف بعضنا فتتفوّق عقولنا على كلّ اختلافاتنا.
أنتم المرده
أنتم السيادة
أنتم كرامة لبنان ومستقبله”.

مسؤول مكتب الشباب والطلاب في “المرده”: نحن شباب معتدّل ومنفتح وإيماننا راسخ في لبنان

بدوره تحدث مسؤول مكتب الشباب والطلاب في “المرده” المهندس أنطوني ضومط، ووجّه كلمة إلى زملائه في المكتب والحضور قائلا:
بهالبلد في كتير ناس خسرت إيمانها… بس نحنا اليوم هون
لنقول: نحنا بعدنا مؤمنين، وبعدنا جاهزين، وبعدنا واقفين!”
مسا الخير للجميع
رسميين وشباب وصبايا
بقول المتل
البيت الصغير بيساع ألف محب
ونحنا اليوم كسرنا هالمتل
شكر كبير للمحل لجمعنا مطعم البحيرة
اكتر من ١١٠٠ شب وصبية حضروا اليوم بين 18 وال 30 سنة
وشكر خاص للمجموعة لتعبت وسهرت لنوصل لهيدي الجَمعة الرائعة
اعذرونا اذا قصّرنا مع حدا او غلطنا مع حدا

انتو الشباب لعم تقدمو من وقتكن وجهدكن
من عكار، طرابلس، الجنوب، البقاع، البترون، بشري، الكورة وزغرتا
من كل جامعات لبنان
شباب المرده بتكبرو القلب بحضوركن
انتو قلب المردة النابض
لما ببيع
ولا بيبدّل قناعاته

ليوم مجتمعين على قضية
آمنتوا فيها
قضية المرده
انتو الشباب لي همكن لبنان
وبس لبنان
لا مناطق ولا طوائف
قضيتكن لبنان الحر الموحد
لستشهد كرماله القائد المعلم طوني فرنجيه
وطالما في هيك شباب ما في خوف عالمرده

كتار جرّبوا يحوّلوا الشباب بلبنان
لشباب طائفي ومناطقي
لشباب يئسان ومكسور
ويقولولن ما في مستقبل
من زمان
ما منسمع منهم غير الخطاب الأسود
أسود متل تاريخن وأفكارن

بس نحنا اليوم هون لنقلّن كلمة وحدة: لأ!!!
نحنا شباب معتدل ومنفتح
شباب بيحبّ لبنان والحياة
شباب بحب لبنان طموح بحب يتحاور ويتعلم ويشتغل
نحنا شباب منشبه لبنان يلّي منحلم في
لبنان الدولة
لبنان المشاركة
لبنان البحبوحة
لبنان الحياة والحياة الكريمة

وبيحكونا عن السيادة
انتو السيادة
بس تشتغلوا للبنان بلا مقابل
بس تساعدوا مجتمعكن وأهلكن وأي لبناني بلا مقابل
بس تكونوا احرار بموقفكن لا سفارة ولا دوله بيمونوا عليكم

وبالإنتخابات…
خلّوني كون واضح أكتر من هيك
نحنا ما رح نكون متفرّجين وما رح نكون أرقام عاللوائح
رح نكون حاضرين بكل ساحة، بكل ضيعة، وبكل صندوق

ت الكل يسمع صوتنا