13 حزيران (1)
بيخبرو عن بنت كان عمرا 10 سنين وقت تركت بيتا ومدرستا ورفقاتا ..بوقتا كانت حاسي انو كل الدني انهارت بالنسبي الها ليش ما بتعرف ..كل شي سمعتو عن موت كتار ….موت زعيم ابن رئيس جمهورية..وكل شي عرفتو انو فيه شي كان ما بيغتفر روح طفلي بريي ما شافت شي من هالدني
بوقتا كل الي كان هاممني بيتي الي بحبو بالاشرفية ، رفيقتي مارلين، مدرستي راهبات المحبة ،قجتي الي نسيتا وهيي عبارة عن تنكة نيدو اشتغلنا فيها انا وخيي يوم تفختناها بدون ما تحس الماما علينا،قجة هيي حصاد سنة من خرجيتي.
غراضنا شفتن عم ينكبوا عالشحن من الطابق التالت كيف ما يوصلوا معليش المهم نمرق شوية غراض ..راجعين عبلدتنا وكأن مش بلدتنا
ذكرياتي هني ببيروت وحراجل ميروبا وعين الجرن..ما كانت زغرتا تعنيلي شي ..ولا حتى اهدن
واكتر شي بذكرو وبكيت عليه انو بعد يومين عيد ميلادي ..واكيد كان لازم يكون فيه شي :هديي جمعة اصحاب ،فرحة،ضحكة بس هلق اكيد رح ينسوني بهالعجق..
امي كانت مولدة خيي شربل كان عمرو 13 يوم ..طفل صغير ما بيعرف الا بدو يرضع ..وامي من بيت فرنجية شربت الهم وصابها الفزع وما كنت اوعا عليها الا عم تبكي
امي الي حبت عيلتا بدمها وعالسكت شو بدا ترضّع ابنا هلق ؟
13 حزيران (2)
4 بيوت تشرّدت ورجعت تنبنى من جديد وحتی قرايبينا الي هون تعرفنا عليهم من جديد
نلعب انا وولاد عمي بالحجر وبالغميضة
اوف.. هول لعب ما شفتن ببيروت ولا حتى بالجبل انجأ كلب يحرس مطعم بيت جدي ما كنت حتى قرّب عليه ..وشجر الكرز المصفر وورق العريش وجورج وكارول ما نسيتن..ريحة مغارة جعيتا ومدرسة عينطورة..وهوا فيطرون
هون كان فيه ستي وداد ..فيه كبة بالجرن ،فيه لبن معزي ..واه يا ستي ما تتعب من العزيمة
تعي دوقي..
تعي كلي ..ما جعتي؟ بسكبلك؟ طبخ رب ..لم زيتون،كبيس كوسا خيار ،قديد لوبيا وباذنجان..
مرضت امي وصارت اعصابا بالويل ،بلشت ساعدا بالبيت ما انا الكبيري..ومرض خيي الصغير الي وعي عالهم وصار معلق فيي وانا معلقا بطفولتي الضايعة
وصرت اكبر.. اكبر وجواتي قلب طفلي..
وعيد ميلادي اختفى عن الروزنامة من وقتا..
واللعب كمان..
صرنا نعرف انو يلي راحوا اغلی من اللعب واغلى حتى من الذكريات
ويلي بقيوا منحبن كتير ويمكن هني ما بيعرفو
بعدني بحب عين الجرن وبيروت بس اهدن ما فيه حدا غيرا بعبي قلبي
ريحة الارض الغالية وعنفوان الشجر وابتسامة “الغزلان” وكل الحلا
وزغرتا الهيبة ووقفة الرجال..