كتبت مديرة مركز الشمال للتوحد سابين سعد لمناسبة اليوم العالمي للتوحد ما يلي”:
اليوم، 2 نيسان، بمناسبة اليوم العالمي للتوحد، تَعو كلّنا نتوحّد ونضوّي شمعة على نية كلّ شخص عندو توحد وعيلتو، بكلّ لبنان.

كل سنة متل هاليوم، 2 نيسان، كنّا نضوّي بلبنان وبكلّ البلدان كتير معالم كبيرة وضخمة باللّون الأزرق، ونتذكّر ونقدّر فرديّة كلّ حدا من هالأشخاص، ونذكّر الناس إنو هالفئة موجودة بالمجتمع وعندا حقوق متلا متل أي مواطن تاني.

لكن للأسف اليوم، 2 نيسان 2020، بسبب هالظرف الإستثنائي والكتير صعب بعد إنتشار فيروس كورونا المستجد، مش قادرين غير إنّو نضوّي شمعة زغيرة، بس مفعولا في يكون كتير كبير.

ظرف كتير صعب على كل الناس، ومن ضمنن الأشخاص يلي عندن توحد كمان،

أشخاص، الروتين هوي أساس بحياتن اليوميّة، تغيّر كل روتين حياتن،
أشخاص مش عارفين كيف يحمو حالن من فيروس كورونا، وكتير منن مش قادرين يوقّفو يلمسو عشوائياً كلّ شي حولن،
أشخاص مش قادرين يتقبّلو يغسّلو إيدين كلّ شوي، وكتير منن مش قادرين لحالن يكونو عم يعملو هالشي يلّي بالنسبة لإلنا كتير بسيط،
أشخاص بحاجة تطلع تركض برّا ولو لوقت قصير ومش قادرة،
أشخاص بحاجة يكون كلّ وقتا مليان والأهل مش دايماً قادرين،
أشخاص حاسّة، من كل شي عم بيصير حَولا، إنو في خوف وفي قلق بس مش قادرة تفهم السبب،
أشخاص عارفة كلّ شي عم بيصير، ومش قادرة تعبّر وتشاركنا مخاوفا، أو يمكن عم بتعبّر بطريقتا الخاصّة يلي نحنا مش عم نفهما،
أهل تعبانين، ولادن بحاحة لإنتباه ورعاية وإهتمام كل الوقت بالبيت وما في حدا يساعدن،
إخوة مش قادرين يدرسو لأن يمكن عندن خيّ أو أخت كل الوقت عم بيصرّخ،
ولاد توقّفت كل جلساتن العلاجيّة وحصص التدريس يلي كانت عم تساعدن ليطوّروا قدراتن يوم بعد يوم،
ولاد تسكّرت مؤسسات كانت ترعاهن وتحضنن وتحبّن من كلّ قلبا،
ولاد اشتاقو لرفقاتن وأساتذتن يلّي تعوّدو يشوفوهن كل يوم وفجأة بطّلو،
ولاد عم بيقضّو كل يوم ساعات كتيرة من وقتن على التليفون أو التلفزيون، وتأثير هالموضوع ممكن يكون كتير كبير وسلبي علين،
ولاد ممكن يكون عندن مشاكل صحيّة ومناعتن أضعف من غيرن ومعرّضين بأي لحظة يلقطو هالفيروس،
وغيرن كتير…

اليوم، ما عنّا غير هالشمعة نضويلكن ياها، إنتو ضوّيتو بمحبتكن وبراءتكن كتير قلوب كانت مطفيّة، اليوم دورنا نحنا نضوّيلكن هالشمعة ونصلّي لربنا يحفظكن ويحفظ أهلكن ونرجع نشوفكن متل قبل ونحبكن أكتر من قبل.

#منتوحد_حول_التوحد

#لبنان_بيتوحد_حول_التوحد

#خليك_بالبيت”.